خضدار میں گرمی کی شدت برقرار، تھادل اور ٹھنڈے مشروبات کی مانگ میں اضافہ

خضدار: گرمی کی شدت میں مسلسل اضافے کے باعث خضدار شہر میں ٹھنڈے اور میٹھے مشروبات کے اسٹالز پر شہریوں کا رش بڑھ گیا ہے۔ شدید گرمی اور دھوپ سے بچنے کے لیے لوگ بڑی تعداد میں مقامی مشروبات خصوصاً تھادل کا رخ کر رہے ہیں۔

شہریوں کا کہنا ہے کہ تھادل گرمی کے موسم میں جسم کو ٹھنڈک، توانائی اور تازگی فراہم کرنے میں مددگار ثابت ہوتا ہے۔ نوجوانوں اور بزرگوں سمیت مختلف عمر کے افراد اس مشروب کو اپنی اولین ترجیح قرار دے رہے ہیں۔

دکانداروں کے مطابق درجہ حرارت میں اضافے کے ساتھ ٹھنڈے مشروبات کی طلب میں نمایاں اضافہ دیکھنے میں آتا ہے، جس سے کاروباری سرگرمیوں میں بھی بہتری آتی ہے۔

تھادل اور دیگر مقامی مشروبات کی تیاری میں بادام، خشخاش، سونف، الائچی، دودھ، چینی، برف، لیموں اور دیگر قدرتی اجزاء استعمال کیے جاتے ہیں۔ ماہرین کے مطابق ایسے مشروبات گرمی کے موسم میں جسم میں پانی کی کمی پوری کرنے، توانائی بحال رکھنے اور تازگی فراہم کرنے میں معاون ثابت ہو سکتے ہیں۔