کوئٹہ میں انسدادِ دہشت گردی پر راؤنڈ ٹیبل کانفرنس، ادارہ جاتی تعاون اور عوامی شمولیت پر زور

رپورٹ: محمد خان کاکڑ

بلوچستان میں انسدادِ دہشت گردی، دہشت گردوں کی مالی معاونت کی روک تھام اور پرتشدد انتہا پسندی کے انسداد سے متعلق ادارہ جاتی اور پارلیمانی استعداد کو مضبوط بنانے کے لیے کوئٹہ میں ایک اہم راؤنڈ ٹیبل کانفرنس کا انعقاد کیا گیا۔

نجی ہوٹل میں منعقدہ اس کانفرنس کا اہتمام بلوچستان سینٹر آف ایکسیلنس، حکومتِ بلوچستان، ایس ایس ڈی او اور برطانوی ہائی کمیشن کے اشتراک سے کیا گیا، جس میں سرکاری حکام، ارکانِ اسمبلی، ماہرینِ تعلیم، مذہبی رہنماؤں، خواتین، میڈیا اور سول سوسائٹی کے نمائندوں نے شرکت کی۔

شرکا نے اس بات پر زور دیا کہ دہشت گردی کے خاتمے کے لیے ادارہ جاتی تعاون، مؤثر حکمتِ عملی اور عوامی شمولیت ناگزیر ہے۔

ممبر بلوچستان اسمبلی انجینئر زمرک خان اچکزئی نے کہا کہ عوام کے تحفظات سن کر طویل المدتی پالیسی تشکیل دینا وقت کی اہم ضرورت ہے۔

مشیر وزیراعلیٰ بلوچستان مینا مجید بلوچ نے کہا کہ نوجوانوں کو دہشت گردی اور انتہا پسندانہ سوچ سے محفوظ رکھنے کے لیے معاشرے کے ہر طبقے کو بلا خوف اپنا کردار ادا کرنا ہوگا۔

ایڈیشنل چیف سیکرٹری داخلہ محمد حمزہ شفقات نے کہا کہ حکومت دہشت گردی کے خاتمے کے لیے مختلف اقدامات کر رہی ہے، جن میں سینٹر آف ایکسیلنس کا قیام اور قانون نافذ کرنے والے اداروں کی استعداد کار میں اضافہ شامل ہے۔

کانفرنس کے اختتام پر شرکا نے اس عزم کا اعادہ کیا کہ مشترکہ کوششوں، نوجوانوں کی مثبت رہنمائی اور اداروں کے باہمی تعاون سے ہی دہشت گردی اور پرتشدد انتہا پسندی کا مؤثر مقابلہ کیا جا سکتا ہے۔

Keywords : Counterterrorism, Violent Extremism, Quetta Conference, Institutional Cooperation