زیارت کلیئرنس آپریشن مکمل، 15 دہشت گرد ہلاک: شاہد رند

ترجمان حکومت بلوچستان شاہد رند نے کہا کہ زیارت میں سیکیورٹی فورسز، بلوچستان پولیس اور دیگر قانون نافذ کرنے والے اداروں نے کلیئرنس آپریشن کامیابی سے مکمل کرتے ہوئے 15 دہشت گردوں کو ہلاک کر دیا۔ انہوں نے کہا کہ دہشت گردوں کے خلاف انٹیلی جنس بنیادوں پر کارروائیاں مزید مؤثر انداز میں جاری رہیں گی اور بلوچستان کے امن و استحکام پر کوئی سمجھوتہ نہیں کیا جائے گا۔

کوئٹہ: ترجمان حکومت بلوچستان شاہد رند نے کہا ہے کہ زیارت میں فتنہ الخوارج کے دہشت گردوں کے خلاف سیکیورٹی فورسز، بلوچستان پولیس اور دیگر قانون نافذ کرنے والے اداروں کا کلیئرنس آپریشن کامیابی سے مکمل کر لیا گیا، جس کے دوران 15 دہشت گرد ہلاک ہوگئے۔

شاہد رند نے کہا کہ دہشت گردوں کو بلوچستان کے امن سے کھیلنے کی بھاری قیمت چکانا پڑی اور ریاست ہر حملے کا پوری قوت اور فیصلہ کن انداز میں جواب دے رہی ہے۔ انہوں نے کہا کہ سیکیورٹی فورسز اور قانون نافذ کرنے والے اداروں نے دہشت گردوں کے مذموم عزائم ناکام بنا دیے ہیں۔انہوں نے کہا کہ بلوچستان میں دہشت گردوں کے لیے کوئی محفوظ پناہ گاہ موجود نہیں اور دہشت گردی کے خلاف انٹیلی جنس بنیادوں پر کارروائیاں مزید مؤثر انداز میں جاری رکھی جائیں گی۔ ان کا کہنا تھا کہ ریاستی رٹ کو چیلنج کرنے والے عناصر کو ہر صورت منطقی انجام تک پہنچایا جائے گا۔ترجمان حکومت بلوچستان نے کہا کہ زیارت میں شہید ہونے والے پولیس افسران اور اہلکاروں کی قربانیاں رائیگاں نہیں جائیں گی اور ان کے خون کا حساب لیا جائے گا۔ انہوں نے اس عزم کا اعادہ کیا کہ بلوچستان کے امن، استحکام اور عوام کے جان و مال کے تحفظ پر کوئی سمجھوتہ نہیں کیا جائے گا، جبکہ دہشت گردوں کا مکمل خاتمہ حکومت کی اولین ترجیح ہے۔ا