مضبوط پارلیمانی نظام ہی مستحکم اور خوشحال پاکستان کی ضمانت ہے: وزیراعلیٰ بلوچستان

عالمی یومِ پارلیمان پر وزیراعلیٰ بلوچستان میر سرفراز بگٹی نے کہا کہ مضبوط پارلیمان، آئین کی بالادستی اور قانون کی حکمرانی قومی استحکام اور ترقی کی بنیاد ہیں۔ انہوں نے شفاف طرزِ حکمرانی، مؤثر قانون سازی، عوامی خدمت اور خواتین و نوجوانوں کی مؤثر نمائندگی کے عزم کا اعادہ کیا۔

کوئٹہ: عالمی یومِ پارلیمان کے موقع پر وزیراعلیٰ بلوچستان میر سرفراز بگٹی نے اپنے پیغام میں کہا ہے کہ مضبوط پارلیمانی نظام ہی مستحکم، خوشحال اور ترقی یافتہ پاکستان کی ضمانت ہے۔ انہوں نے کہا کہ یہ دن دنیا بھر میں جمہوری اقدار، پارلیمانی روایات، قانون کی حکمرانی اور عوامی نمائندگی کی اہمیت کو اجاگر کرنے کا مؤثر موقع فراہم کرتا ہے۔

وزیراعلیٰ نے کہا کہ ایک مضبوط اور فعال پارلیمان پُرامن، مستحکم اور ترقی یافتہ معاشرے کی بنیاد ہوتی ہے، جہاں عوام کی آواز آئینی اور جمہوری انداز میں سنی جاتی ہے اور قانون سازی کے ذریعے قومی مسائل کا حل تلاش کیا جاتا ہے۔

میر سرفراز بگٹی نے کہا کہ آئینِ پاکستان پارلیمانی جمہوریت کے لیے مضبوط بنیاد فراہم کرتا ہے اور تمام ریاستی ادارے آئین کے دائرہ کار میں رہتے ہوئے اپنی ذمہ داریاں انجام دیتے ہیں۔ انہوں نے کہا کہ جمہوری اداروں کا استحکام، آئین کی بالادستی اور قانون کی حکمرانی قومی یکجہتی، سیاسی استحکام اور پائیدار ترقی کی ضمانت ہیں۔

انہوں نے کہا کہ بلوچستان اسمبلی صوبے کے عوام کی امنگوں کی حقیقی ترجمان ہے اور صوبائی حکومت عوامی مسائل کے حل، مؤثر قانون سازی، شفاف طرزِ حکمرانی اور عوامی خدمت کو اپنی اولین ترجیحات میں شامل رکھتی ہے۔

وزیراعلیٰ بلوچستان نے اس بات پر زور دیا کہ پارلیمانی روایات، احتساب، شفافیت اور باہمی مشاورت کے اصولوں کو مزید مضبوط بنانا وقت کی اہم ضرورت ہے تاکہ عوام کے اعتماد پر پورا اترا جا سکے۔

انہوں نے کہا کہ موجودہ دور میں پارلیمان کا کردار صرف قانون سازی تک محدود نہیں بلکہ قومی اتفاقِ رائے، سماجی ہم آہنگی، عوامی فلاح اور پائیدار ترقی کے اہداف کے حصول میں بھی کلیدی اہمیت رکھتا ہے۔ ان کا کہنا تھا کہ خواتین، نوجوانوں اور معاشرے کے تمام طبقات کی مؤثر نمائندگی جمہوری نظام کو مزید مضبوط بناتی ہے۔

میر سرفراز بگٹی نے اس عزم کا اعادہ کیا کہ حکومت بلوچستان آئین کی بالادستی، جمہوری روایات، شفاف حکمرانی اور عوامی خدمت کے اصولوں پر کاربند رہتے ہوئے صوبے میں مؤثر قانون سازی، بہتر طرزِ حکمرانی اور عوامی فلاح و بہبود کے لیے اپنی کوششیں جاری رکھے گی۔