بلوچستان میں سات روزہ خصوصی پولیو بوسٹر مہم آج سے شروع، 7 لاکھ 30 ہزار سے زائد بچوں کو ویکسین دی جائے گی

ایمرجنسی آپریشنز سینٹر بلوچستان کی جانب سے 13 جولائی سے 142 ہائی رسک یونین کونسلز میں سات روزہ خصوصی پولیو بوسٹر مہم شروع کی جا رہی ہے۔ مہم کے دوران پانچ سال سے کم عمر 7 لاکھ 30 ہزار 670 سے زائد بچوں کو حفاظتی ٹیکے لگائے جائیں گے، جبکہ اس مقصد کے لیے تقریباً 2 ہزار 700 ٹیمیں تشکیل دی گئی ہیں

کوئٹہ: ایمرجنسی آپریشنز سینٹر (ای او سی) بلوچستان 13 جولائی سے صوبے کے 142 ہائی رسک یونین کونسلز میں سات روزہ خصوصی فریکشنل اِن ایکٹیویٹڈ پولیو ویکسین (ایف آئی پی وی) بوسٹر مہم کا آغاز کرے گا، جس کے دوران پانچ سال سے کم عمر 7 لاکھ 30 ہزار 670 سے زائد بچوں کو حفاظتی ٹیکے لگائے جائیں گے۔

ای او سی بلوچستان کے کوآرڈینیٹر انعام الحق کے مطابق مہم کا مرکز کوئٹہ، پشین، قلعہ عبداللہ، چمن اور بارشور کے وہ علاقے ہوں گے جہاں پولیو وائرس کی موجودگی اب بھی تشویشناک ہے۔

انہوں نے بتایا کہ مہم کی کامیاب تکمیل کے لیے تقریباً 2 ہزار 700 ویکسی نیشن ٹیمیں تشکیل دی گئی ہیں، جو سات روز تک گھر گھر جا کر بچوں کو حفاظتی ٹیکے لگائیں گی۔

انعام الحق نے کہا کہ اس مہم کا مقصد بچوں کی قوتِ مدافعت کو مزید مضبوط بنانا اور پولیو وائرس کی منتقلی کو روکنا ہے۔ انہوں نے والدین سے اپیل کی کہ وہ اپنی پانچ سال سے کم عمر تمام بچوں کو پولیو سے بچاؤ کے حفاظتی ٹیکے ضرور لگوائیں تاکہ بلوچستان کو پولیو سے پاک بنانے کی کوششوں کو کامیاب بنایا جا سکے۔