گورنر بلوچستان نے ڈیجیٹل ہیلتھ انفارمیشن سسٹم اور الیکٹرانک میڈیکل ریکارڈ ماڈیول کا افتتاح کر دیا

گورنر بلوچستان جعفر خان مندوخیل نے صحت کے شعبے میں شفافیت، جوابدہی اور مؤثر نگرانی کے لیے ڈیجیٹل ہیلتھ انفارمیشن سسٹم (DHIS) اور الیکٹرانک میڈیکل ریکارڈ (EMR) ماڈیول کا افتتاح کیا۔ انہوں نے کہا کہ جدید نظام سے طبی سہولیات، ادویات، عملے کی حاضری اور صحت مراکز کی کارکردگی کی مؤثر نگرانی ممکن ہوگی۔

کوئٹہ: گورنر بلوچستان جعفر خان مندوخیل نے بلوچستان کی تیسری ہیلتھ کیئر لیڈرشپ کانفرنس کے موقع پر ڈیجیٹلائزڈ ہیلتھ انفارمیشن سسٹم (DHIS) اور الیکٹرانک میڈیکل ریکارڈ (EMR) ماڈیول کا افتتاح کر دیا۔اس موقع پر خطاب کرتے ہوئے انہوں نے کہا کہ ڈیجیٹل ہیلتھ انفارمیشن سسٹم کے نفاذ سے صوبے کے صحت کے شعبے میں شفافیت، جوابدہی اور مؤثر نگرانی کو فروغ ملے گا۔

انہوں نے کہا کہ نئے نظام کے تحت تمام مراکز صحت کا ڈیٹا باقاعدگی سے ریکارڈ کیا جائے گا، جبکہ ڈاکٹروں اور پیرا میڈیکل عملے کی حاضری، ادویات کی فراہمی و تقسیم، طبی سہولیات اور ضلعی سطح پر صحت مراکز، عمارتوں اور لیبر رومز کی فعالیت کی بھی مسلسل نگرانی ممکن ہوگی۔گورنر بلوچستان نے کہا کہ اس اقدام سے ہسپتالوں اور بنیادی مراکز صحت کی کارکردگی بہتر ہوگی اور پہلی مرتبہ ڈسٹرکٹ ہیلتھ آفیسرز اور میڈیکل سپرنٹنڈنٹس کو اپنے اداروں کی کارکردگی کے حوالے سے جوابدہ بنایا جائے گا۔ انہوں نے اس پیش رفت پر صوبائی وزیر صحت بخت محمد کاکڑ اور سیکرٹری صحت مجیب الرحمٰن پانیزئی کی کاوشوں کو سراہا۔انہوں نے کہا کہ بلوچستان جیسے وسیع رقبے اور منتشر آبادی والے صوبے میں عوام تک معیاری طبی سہولیات کی فراہمی ایک بڑا چیلنج ہے، جس سے نمٹنے کے لیے جدید ٹیکنالوجی اور مؤثر انتظامی نظام ناگزیر ہیں۔ انہوں نے اقوام متحدہ اور دیگر بین الاقوامی اداروں سے بلوچستان میں صحت سمیت بنیادی سہولیات کی فراہمی کے لیے تعاون بڑھانے کی بھی اپیل کی۔کانفرنس میں صوبائی وزیر صحت بخت محمد کاکڑ، سیکرٹری صحت مجیب الرحمٰن پانیزئی، پاکستان میں یونیسف کی چیف فٹسم آسیفا، ڈاکٹروں، پیرا میڈیکل عملے اور صحت کے شعبے سے تعلق رکھنے والے دیگر نمائندوں نے شرکت کی۔