انسدادِ پولیو مہم: ڈپٹی کمشنر کوئٹہ کا فرضی کوریج اور جعلی فنگر مارکنگ پر سخت ایکشن

ڈپٹی کمشنر کوئٹہ مہراللہ بادینی کی زیرِ صدارت اجلاس میں انسدادِ پولیو مہم کے دوسرے روز کی کارکردگی، حفاظتی ٹیکہ کاری کی کوریج اور درپیش مسائل کا جائزہ لیا گیا۔ انہوں نے ہر بچے تک ویکسین کی رسائی یقینی بنانے، فرضی کوریج اور جعلی فنگر مارکنگ میں ملوث اہلکاروں کے خلاف کارروائی کا حکم دیتے ہوئے متعدد پولیو ٹیمیں بھی تبدیل کر دیں۔

کوئٹہ: ڈپٹی کمشنر کوئٹہ مہراللہ بادینی کی زیرِ صدارت انسدادِ پولیو مہم کے دوسرے روز کی پیش رفت کا جائزہ لینے کے لیے شام کا جائزہ اجلاس منعقد ہوا، جس میں قومی ایمرجنسی آپریشن سینٹر، ضلعی محکمہ صحت، صوبائی مانیٹرز اور دیگر متعلقہ افسران نے شرکت کی۔

اجلاس میں بچوں کو پلائی جانے والی پولیو ویکسین، انجیکشن کے ذریعے دی جانے والی حفاظتی خوراک، ویکسین سے انکار کرنے والے خاندانوں، اسکولوں میں ویکسینیشن کی کوریج اور مجموعی کارکردگی پر تفصیلی بریفنگ دی گئی۔

ڈپٹی کمشنر نے تمام مانیٹرز، متعلقہ اہلکاروں اور اسسٹنٹ کمشنرز کو مقررہ اہداف کے حصول کے لیے خصوصی ٹاسک سونپتے ہوئے ہدایت کی کہ ہر اہل بچے تک ویکسین کی رسائی ہر صورت یقینی بنائی جائے۔

انہوں نے جعلی فنگر مارکنگ اور فرضی کوریج پر سخت برہمی کا اظہار کرتے ہوئے واضح کیا کہ اس قسم کی غفلت کسی صورت برداشت نہیں کی جائے گی۔ انہوں نے ذمہ دار اہلکاروں کے خلاف کارروائی کا حکم دیا جبکہ ناقص کارکردگی پر متعدد پولیو ٹیموں کو بھی تبدیل کر دیا گیا۔