صحت کی سہولیات کی بہتری کے لیے بولان میڈیکل کمپلیکس میں سولرائزیشن منصوبے کا افتتاح

کوئٹہ میں بولان میڈیکل کمپلیکس ہسپتال میں سولرائزیشن منصوبے کا افتتاح کر دیا گیا، جس کا مقصد ہسپتال کے اہم شعبوں کو بلا تعطل بجلی فراہم کرنا ہے۔ منصوبے سے مریضوں کو بہتر اور معیاری طبی سہولیات کی فراہمی ممکن ہو سکے گی۔

رپورٹ: سیدہ نتاشا

بلوچستان میں صحت کے شعبے کو بہتر بنانے اور مریضوں کو معیاری طبی سہولیات کی فراہمی کے لیے بولان میڈیکل کمپلیکس (بی ایم سی) ہسپتال میں سولرائزیشن منصوبے کا باضابطہ افتتاح کر دیا گیا۔ اس منصوبے کا مقصد ہسپتال میں بجلی کی مسلسل اور قابلِ اعتماد فراہمی کو یقینی بنانا ہے تاکہ علاج و معالجے کا عمل بغیر کسی تعطل کے جاری رہ سکے۔

افتتاحی تقریب 22 جنوری 2026 کو منعقد ہوئی، جس میں صوبائی وزیرِ صحت بخت محمد کاکڑ، اقوامِ متحدہ کے ریزیڈنٹ کوآرڈینیٹر محمد یحییٰ، پاکستان میں UNHCR کی نمائندہ محترمہ فلپا کینڈلر، آئی او ایم کی کنٹری نمائندہ میو ساتو، UNHCR سب آفس کوئٹہ کے ہیڈ ٹیسفائے بیکلے اور UNDP سب آفس کوئٹہ کے ہیڈ ذوالفقار درانی سمیت دیگر اعلیٰ حکام نے شرکت کی۔
تقریب سے خطاب کرتے ہوئے مقررین نے کہا کہ بولان میڈیکل کمپلیکس بلوچستان کا ایک بڑا سرکاری ہسپتال ہے جہاں روزانہ ہزاروں مریض علاج کے لیے رجوع کرتے ہیں۔ سولرائزیشن منصوبے کے تحت ہسپتال کے اہم شعبہ جات جن میں ایمرجنسی، آپریشن تھیٹرز، آئی سی یو، لیبارٹریز، زچہ و بچہ وارڈز اور دیگر کلینیکل یونٹس شامل ہیں، کو بلا تعطل بجلی فراہم کی جائے گی، جس سے جان بچانے والی طبی سہولیات مزید مؤثر ہو سکیں گی۔
صوبائی وزیرِ صحت بخت محمد کاکڑ نے کہا کہ صحت کے شعبے میں بجلی کی دستیابی براہِ راست انسانی جانوں سے جڑی ہوئی ہے۔ انہوں نے کہا کہ اس منصوبے سے نہ صرف علاج کے معیار میں بہتری آئے گی بلکہ طبی عملے کو بھی بہتر ماحول میں خدمات انجام دینے کا موقع ملے گا۔ انہوں نے UNHCR اور دیگر شراکت دار اداروں کے تعاون کو سراہتے ہوئے کہا کہ ایسے منصوبے عوامی فلاح کے لیے انتہائی اہم ہیں۔
UNHCR کے نمائندوں نے اس موقع پر اس عزم کا اظہار کیا کہ صحت کے شعبے میں پائیدار اور مؤثر اقدامات کے ذریعے عوام کو بہتر سہولیات فراہم کرنا ادارے کی ترجیحات میں شامل ہے، اور مستقبل میں بھی بلوچستان میں صحت سے متعلق منصوبوں میں تعاون جاری رکھا جائے گا۔
یہ سولرائزیشن منصوبہ صحت کے شعبے کو جدید تقاضوں سے ہم آہنگ کرنے، مریضوں کو بہتر علاج کی سہولت فراہم کرنے اور سرکاری ہسپتالوں کی مجموعی کارکردگی کو بہتر بنانے کی جانب ایک اہم پیش رفت قرار دیا جا رہا ہے۔