پشین کے علاقے کلی کربلا میں کاؤنٹر ٹیررازم ڈیپارٹمنٹ نے خفیہ اطلاع پر کارروائی کرتے ہوئے دہشت گردی کے مقدمات میں مطلوب ملزمان کے خلاف آپریشن کیا۔ فائرنگ کے تبادلے میں سید ثنااللہ آغا اور اس کے بھائیوں سمیت متعدد ملزمان ہلاک ہوگئے، جبکہ کارروائی کے دوران سی ٹی ڈی کے اہلکار بھی زخمی ہوئے۔
وزیر اعلیٰ بلوچستان میر سرفراز بگٹی نے کہا ہے کہ صوبے میں خواتین کو بااختیار بنانے اور پولیس نظام کو عوام دوست بنانے کے لیے نصیر آباد رینج کے تمام اضلاع میں خواتین پولیس اہلکاروں کو اہم اور ذمہ دارانہ عہدوں پر تعینات کر دیا گیا ہے۔ ان تعیناتیوں سے گھریلو تشدد اور دیگر عوامی شکایات کے فوری ازالے میں بہتری آئی ہے اور عوام کا پولیس پر اعتماد بڑھ رہا ہے۔
پاکستان کوسٹ گارڈز نے جیونی کی سمندری حدود میں غیر قانونی ماہی گیری کے خلاف کارروائی کرتے ہوئے دو ٹرالروں کو تحویل میں لے کر 40 افراد کو گرفتار کر لیا۔ حکام کے مطابق یہ کارروائیاں ٹرالر مافیا کے خاتمے، مقامی ماہی گیروں کے حقوق کے تحفظ اور سمندری وسائل کی حفاظت کے لیے جاری رہیں گی، جسے مقامی ماہی گیروں نے خوش آئند قرار دیا ہے۔
کوئٹہ میں عالمی کسٹمز ڈے کے موقع پر کلیکٹریٹ کسٹمز میں تقریب منعقد ہوئی، جس میں چیف کلکٹر کسٹمز مقصود احمد، کلکٹر انفورسمنٹ کرم اللہ اور دیگر افسران نے شرکت کی۔ تقریب میں نمایاں کارکردگی دکھانے والے افسران میں تعریفی اسناد تقسیم کی گئیں۔ اس موقع پر اسمگلنگ کی روک تھام، ریونیو اہداف کے حصول اور محدود وسائل کے باوجود بہتر کارکردگی پر روشنی ڈالی گئی۔
وزیر اعلیٰ بلوچستان میر سرفراز بگٹی کا کہنا ہے کہ صوبہ شدید موسمی ہنگامی صورتحال سے دوچار ہے، جس کے باعث حکومت کی تمام مشینری ریسکیو اور ریلیف آپریشنز میں مصروف ہے۔ انہوں نے احتجاج اور سڑکوں کی بندش کو انسانی جانوں کے لیے خطرہ قرار دیتے ہوئے تمام سیاسی و سماجی قوتوں سے تعاون کی اپیل کی ہے۔
انسپکٹر جنرل پولیس بلوچستان محمد طاہر نے اشتہاری مجرموں کے خلاف خصوصی مہم کے آغاز کا اعلان کرتے ہوئے اعلیٰ کارکردگی دکھانے والے پولیس افسران اور اہلکاروں کے لیے انعامات کا اعلان کیا ہے۔ مہم 26 جنوری سے 24 فروری 2026 تک جاری رہے گی، جس میں تمام دستیاب وسائل بروئے کار لائے جائیں گے۔
بلوچستان کے مختلف اضلاع میں بارش اور برفباری کا ایک اور سلسلہ داخل ہوگیا ہے جس کے باعث سردی کی شدت میں اضافہ ہوگیا۔ محکمہ موسمیات کے مطابق آئندہ دو روز تک بارش اور برفباری کا امکان ہے، جبکہ پی ڈی ایم اے اور این ایچ اے نے شاہراہوں پر ہیوی مشینری تعینات کر دی ہے۔
وزیر اعلیٰ بلوچستان میر سرفراز بگٹی نے پنجگور میں سیکیورٹی فورسز کے کامیاب انٹیلی جنس بیسڈ آپریشن پر اطمینان کا اظہار کرتے ہوئے کہا ہے کہ دہشت گردی کے خلاف کارروائیاں پوری قوت کے ساتھ جاری رہیں گی۔ انہوں نے واضح کیا کہ بلوچستان میں بدامنی پھیلانے والے عناصر کے لیے کوئی گنجائش نہیں اور صوبائی حکومت امن و امان کے قیام کے لیے فورسز کے ساتھ مکمل تعاون جاری رکھے گی۔
حکومتِ بلوچستان نے کوئٹہ میں آوارہ کتوں اور بلیوں کے مسئلے کے حل کے لیے قتل کے بجائے بین الاقوامی معیار کے TNVR طریقہ کار کو اپنانے کی ہدایت جاری کر دی ہے۔ وزیر اعلیٰ میر سرفراز بگٹی کا کہنا ہے کہ جانوروں کا تحفظ ایک مہذب اور ذمہ دار معاشرے کی علامت ہے۔
نوشکی میں بلوچستان اسپیشل ڈیولپمنٹ انیشیٹو (بی ایس ڈی آئی) کے تحت ترقیاتی کام جاری ہیں۔ ڈپٹی کمشنر محمد حسین ہزارہ اور متعلقہ حکام نے قاضی آباد میں نصب 600 فٹ گہرائی والے ٹیوب ویل کا دورہ کیا۔ اس منصوبے کا مقصد علاقے میں پانی کی دستیابی کو بہتر بنانا ہے۔ ڈپٹی کمشنر نے کہا کہ بی ایس ڈی آئی کی اسکیمیں وقت سے قبل مکمل کی جائیں گی تاکہ عام عوام کو زیادہ سے زیادہ فائدہ پہنچ سکے۔
بلوچستان کے ساؤتھ ماشکیل رائفلز نے منشیات کی اسمگلنگ کے خلاف سخت کارروائی کرتے ہوئے تین ٹن منشیات ضبط کر لیں، جن کی مجموعی مالیت تقریباً 50 کروڑ روپے ہے۔ ضبط شدہ منشیات 17 جنوری 2026 کو ایف سی، پولیس، ضلعی انتظامیہ اور مقامی عمائدین کی موجودگی میں نذر آتش کی گئیں۔ یہ اقدامات نوجوان نسل کے مستقبل کے تحفظ اور معاشرے کو منشیات کے نقصان دہ اثرات سے پاک کرنے کے لیے کیے گئے ہیں۔
وزیر اعلیٰ بلوچستان میر سرفراز بگٹی کی خصوصی ہدایات پر صوبائی وزیر صحت بخت محمد کاکڑ اور سیکرٹری مواصلات و تعمیرات بابر خان نے کوئٹہ کے سپنی روڈ پر زیرِ تعمیر ٹراما سینٹر کا دورہ کیا۔ حکام نے منصوبے کی پیش رفت، معیار اور بروقت تکمیل پر زور دیا جبکہ متعلقہ افسران نے منصوبے کو مقررہ وقت میں مکمل کرنے کی یقین دہانی کرائی۔
بلوچستان کے برف باری سے متاثرہ علاقوں میں پی ڈی ایم اے نے بروقت اور مؤثر ریسکیو آپریشن مکمل کرتے ہوئے سینکڑوں مسافروں کو محفوظ مقامات پر منتقل کیا۔ وزیر اعلیٰ بلوچستان نے پی ڈی ایم اے اور ریسکیو ٹیموں کی کارکردگی کو سراہتے ہوئے حسنِ کارکردگی سرٹیفکیٹس دینے کا اعلان کیا ہے۔
بیکڑ میں بے روزگار نوجوانوں کو بااختیار بنانے کے لیے لیڈرشپ ڈویلپمنٹ پروگرام کا آغاز کر دیا گیا ہے، جس میں 75 سے زائد نوجوان شریک ہیں۔ پروگرام کا مقصد نوجوانوں میں خود اعتمادی، عملی مہارتیں اور سماجی ذمہ داری کا شعور اجاگر کرنا ہے تاکہ وہ مستقبل کے چیلنجز کا مؤثر انداز میں سامنا کر سکیں اور معاشرے میں مثبت کردار ادا کریں۔
وزیر اعلیٰ بلوچستان میر سرفراز بگٹی نے پشین میں غیرقانونی کرومائٹ مائننگ کے خلاف کامیاب کارروائی کا اعلان کرتے ہوئے 47 غیرقانونی کانوں کی بندش کی تصدیق کی ہے۔ انہوں نے کہا کہ معدنی وسائل صوبے کے عوام کی ملکیت ہیں اور غیرقانونی مائننگ کسی صورت برداشت نہیں کی جائے گی۔
آئی جی پولیس بلوچستان محمد طاہر نے پولیس ٹریننگ کالج کے دورے کے دوران کہا ہے کہ کھیلوں کے فروغ سے نوجوان نسل کو مثبت سرگرمیوں کی جانب راغب کیا جا سکتا ہے۔ ان کا کہنا تھا کہ کھیل نظم و ضبط، ٹیم ورک اور پیشہ ورانہ صلاحیتوں کو بہتر بناتے ہیں۔ اس موقع پر مختلف کھیلوں کے مقابلے منعقد کیے گئے اور نمایاں کارکردگی دکھانے والے جوانوں میں انعامات تقسیم کیے گئے۔
وزیر اعلیٰ بلوچستان میر سرفراز بگٹی کا کہنا ہے کہ صوبے بھر میں تجاوزات کے خلاف بھرپور اور بلاامتیاز کارروائیاں جاری ہیں، جن کے دوران تین ہزار سے زائد آپریشنز اور 800 سے زیادہ غیرقانونی پٹرول پمپس سیل کیے جا چکے ہیں۔ سرکاری زمین پر کسی قسم کا قبضہ برداشت نہیں کیا جائے گا۔
بلوچستان کے مختلف علاقوں میں بارش اور برفباری کے باعث سردی کی شدت میں اضافہ ہو گیا ہے۔ کوئٹہ، زیارت، خوجک پاس اور شمالی علاقوں میں موسم کی خرابی سے معمولاتِ زندگی متاثر ہوئے ہیں جبکہ برف ہٹانے کا عمل جاری ہے۔ محکمہ موسمیات نے آئندہ دنوں میں مزید بارش اور برفباری کا امکان ظاہر کیا ہے۔
کوئٹہ میں حالیہ بارش اور برفباری کے بعد مختلف علاقوں میں پھیلنے والی گندگی اور کیچڑ کے خاتمے کے لیے صفا کوئٹہ نے فوری صفائی آپریشن شروع کر دیا ہے۔ شہر کی اہم سڑکوں پر مشینری اور عملہ متحرک ہے تاکہ شہریوں کو آمد و رفت میں سہولت فراہم کی جا سکے۔
بلوچستان میں حالیہ برفباری کے بعد وزیراعلیٰ میر سرفراز بگٹی کی ہدایت پر ڈائریکٹر جنرل پی ڈی ایم اے جہانذیب خان نے کان مہترزئی کا دورہ کیا۔ قومی شاہراہوں سے برف ہٹانے کا کام جاری ہے جبکہ پی ڈی ایم اے کی ٹیمیں ہیوی مشنری کے ساتھ متاثرہ علاقوں میں موجود ہیں۔ عوام کو غیر ضروری سفر سے گریز کی ہدایت کی گئی ہے۔
