کوئٹہ: بلوچستان یوتھ ریسورس سینٹر میں ڈائریکٹوریٹ آف یوتھ افیئرز بلوچستان اور بلوچستان یوتھ ریسورس سینٹر کی آفیشل ویب سائٹس کے اجرا کے حوالے سے ایک اہم اجلاس منعقد ہوا۔ اجلاس کی صدارت مشیر وزیراعلیٰ برائے کھیل و امورِ نوجوانان محترمہ مینا مجید بلوچ نے کی۔
اجلاس میں ڈائریکٹر یوتھ افیئرز بلوچستان جناب الیاس بلوچ، سیکشن آفیسر عبدالغفور بلوچ، عدنان خان (چیف آپریٹنگ آفیسر، لائژن کارپوریشن)، کاشف خان (ہیومن کیپیٹل ڈویلپمنٹ اسپیشلسٹ) سمیت بلوچستان یوتھ ریسورس سینٹر کے اراکین نے شرکت کی۔
اجلاس کے دوران کاشف خان نے ڈائریکٹوریٹ آف یوتھ افیئرز کی آفیشل ویب سائٹ کے مختلف فیچرز، تکنیکی ساخت اور نوجوانوں کے لیے دستیاب سہولیات پر تفصیلی بریفنگ دی۔ انہوں نے بتایا کہ ویب سائٹ کے ذریعے نوجوانوں کو تعلیمی، تربیتی اور روزگار سے متعلق معلومات ایک ہی پلیٹ فارم پر فراہم کی جائیں گی۔
اس موقع پر مشیر وزیراعلیٰ محترمہ مینا مجید بلوچ نے کہا کہ یہ ویب سائٹ محض ایک ڈیجیٹل پلیٹ فارم نہیں بلکہ بلوچستان کے نوجوانوں کے لیے ایک سنہرا موقع ہے۔ انہوں نے اس عزم کا اظہار کیا کہ ویب سائٹ کے ذریعے صوبے کے دور دراز علاقوں سے تعلق رکھنے والے نوجوانوں کو بھی یکساں مواقع فراہم کیے جائیں گے۔
محترمہ مینا مجید بلوچ نے ویب سائٹ کے اجرا سے متعلق چند اہم نکات پر روشنی ڈالتے ہوئے امید ظاہر کی کہ تمام ضروری مراحل مکمل کرنے کے بعد اسے جلد از جلد باضابطہ طور پر لانچ کیا جائے گا تاکہ بلوچستان کے نوجوان اس سے بھرپور استفادہ کر سکیں۔
حکومتِ بلوچستان نے صحت کے شعبے میں اہم فیصلہ کرتے ہوئے کنٹریکٹ اور عارضی بھرتیوں پر پابندی عائد کر دی ہے اور اب ڈاکٹرز اور طبی عملہ بلوچستان پبلک سروس کمیشن کے ذریعے مستقل بنیادوں پر تعینات ہوں گے۔ محکمہ صحت کے مطابق اسسٹنٹ پروفیسر، سینئر رجسٹرار اور اسپیشلسٹ کی کنٹریکٹ نوکریاں ختم کی جائیں گی اور گریڈ 16 اور 17 کی مجموعی طور پر 1003 خالی اسامیوں پر مستقل بھرتیوں کے لیے درخواست پبلک سروس کمیشن کو بھیج دی گئی ہے۔ ان اسامیوں میں 560 میڈیکل آفیسرز، 346 لیڈی میڈیکل آفیسرز اور 97 ڈینٹل سرجن شامل ہیں۔ ینگ ڈاکٹرز ایسوسی ایشن کے مطابق یہ اقدام صحت کے شعبے میں کام کی روانی اور معیار کی بہتری کا سبب بنے گا۔ جب مستقل بھرتیاں مکمل ہو جائیں گی تو کنٹریکٹ ملازمین کی خدمات ختم کر دی جائیں گی، تاہم ان کے لیے ہمدردانہ بنیادوں پر ایڈجسٹمنٹ پر بھی غور کیا جائے گا۔ اس فیصلے سے بلوچستان میں صحت کے شعبے میں پائیداری اور بہتر معیار کی توقع کی جا رہی ہے۔
کوئٹہ: اقوام بگٹی کی جانب سے وزیر اعلیٰ بلوچستان میر سرفراز خان بگٹی کو باضابطہ طور پر دستار باندھ کر چیف آف بگٹی قبائل کے منصب سے نوازا گیا۔ دستار بندی کی رسم نواب میر عالی خان بگٹی کے بھائی نوابزادہ زامران سلیم اکبر خان بگٹی اور بگٹی قبیلے کے مختلف طائفوں کے چیفس نے ادا کی۔ تقریب میں اراکین صوبائی و قومی اسمبلی، صوبائی وزراء اور اقوام بگٹی کے عمائدین و معززین کی بڑی تعداد شریک تھی۔
تقریب سے خطاب کرتے ہوئے میر سرفراز بگٹی نے اقوام بگٹی کا شکریہ ادا کرتے ہوئے کہا کہ آج جو دستار ان کے سر پر رکھی گئی ہے وہ ایک امانت ہے جو انصاف، بہادری، بھائی چارے، محبت اور اخلاص کا تقاضا کرتی ہے۔ انہوں نے وعدہ کیا کہ وہ پوری ایمانداری، محنت اور جذبے کے ساتھ اقوام بگٹی کی توقعات پر پورا اترنے کی کوشش کریں گے اور قوم کو مایوس نہیں کریں گے۔
انہوں نے کہا کہ تعلیم بگٹی قبائل کی ترقی کی کنجی ہے، اس مقصد کے لیے ماضی میں بگٹی بچوں کو ملک کے معیاری تعلیمی اداروں میں داخلے دلوائے گئے۔ وزیراعظم پاکستان کے تعاون سے علاقے میں دانش اسکول کی منظوری اور ٹینڈر مکمل ہونے کا ذکر کرتے ہوئے انہوں نے کہا کہ یہ منصوبہ جلد مکمل ہوگا۔ اس کے علاوہ زیرِ تعمیر عظیم الشان عمارت میں 300 بچوں کے لیے تعلیمی سہولیات فراہم کی جائیں گی جبکہ امریکن اسکول کے انڈومنٹ فنڈ کے ذریعے مقامی بچوں کو معیاری تعلیم دی جائے گی۔
میر سرفراز بگٹی نے کہا کہ انہوں نے چیف آف بگٹیز کی ذمہ داری قوم کے اعتماد کی بنیاد پر قبول کی ہے اور وہ دن رات بگٹی قبائل کی خدمت کریں گے۔ قبائلی و ہمسایہ تنازعات کے حل کے لیے مثبت کردار ادا کرنے اور ہر معاملے میں خیر کی راہ اپنانے کا عزم بھی ظاہر کیا۔
انہوں نے بلوچ قوم کو پیغام دیتے ہوئے تشدد کی راہ کو لاحاصل قرار دیا اور کہا کہ بلوچ قوم تشدد سے اپنے مقاصد حاصل نہیں کر سکتی۔ انہوں نے واضح کیا کہ پاکستان کے ساتھ وفاداری غیر متزلزل ہے اور ریاست کی رٹ قائم رکھنا ناگزیر ہے۔ انہوں نے نہتے عوام، مزدوروں، خواتین، انجینیئرز اور ڈاکٹروں کے خلاف تشدد کی مذمت کرتے ہوئے کہا کہ یہ بلوچ روایات کے خلاف ہے۔
آخر میں انہوں نے کہا کہ وہ ہمیشہ مظلوم کے ساتھ کھڑے رہیں گے اور ظلم کے خلاف آواز بلند کریں گے۔ تقریب سے قبل وزیر اعلیٰ بلوچستان نے اقوام بگٹی اور شرکاء سے بلوچی زبان میں بھی خطاب کیا۔
کوئٹہ : ڈپٹی ڈائریکٹر پی ڈی ایم اے بلوچستان اصغر علی جمالی نے متعلقہ محکموں کے نمائندگان کے ہمراہ چلتن پہاڑوں کا دورہ کیا، جہاں ڈبلیو ڈبلیو ایف پاکستان کے تعاون سے جاری سیلابی خطرات میں کمی کے منصوبوں کا جائزہ لیا گیا۔
دورے کے دوران محکمہ آبپاشی اور محکمہ جنگلات کی جانب سے تعمیر کیے گئے سیلابی حفاظتی بندوں اور نیچر بیسڈ سلوشنز پر مبنی منصوبوں کا معائنہ کیا گیا۔ اصغر علی جمالی نے منصوبوں کو انسانی آبادی، مویشیوں اور زرعی اراضی کے تحفظ کے لیے مؤثر قرار دیتے ہوئے متعلقہ اداروں کی کاوشوں کو سراہا اور آئندہ بھی تعاون کی یقین دہانی کرائی۔
کوئٹہ: بانیٔ پاکستان قائداعظم محمد علی جناحؒ کی یومِ پیدائش کے موقع پر بلوچستان یوتھ ریسورس سینٹر کے زیرِ اہتمام ایوب اسٹیڈیم کوئٹہ میں ایک پروقار تقریب منعقد کی گئی، جس کا بنیادی مقصد نوجوانوں کو قائداعظمؒ کی زندگی، افکار اور قیادت سے آگاہ کرنا تھا۔
تقریب کے مہمانِ خصوصی ڈائریکٹر یوتھ افیئرز بلوچستان جناب الیاس بلوچ تھے۔ اس موقع پر کوئٹہ کے نوجوانوں نے بڑی تعداد میں شرکت کی، جبکہ مختلف شعبہ ہائے زندگی سے تعلق رکھنے والی معزز شخصیات بھی تقریب میں شریک ہوئیں۔
تقریب کے دوران کوئز مقابلہ، ملی نغموں کا مقابلہ اور تقریری مقابلے سمیت مختلف سرگرمیوں کا اہتمام کیا گیا، جن میں نوجوانوں کے ساتھ ساتھ بچوں نے بھی جوش و خروش سے حصہ لیا۔ شرکاء نے قائداعظمؒ کی جدوجہد، اصولوں اور قومی خدمات کو خراجِ تحسین پیش کیا۔
تقریب کے دوران قائداعظم ڈے کے حوالے سے کیک بھی کاٹا گیا، جبکہ پروگرام کے اختتام پر مہمانِ خصوصی نے مختلف مقابلہ جاتی سرگرمیوں میں نمایاں کارکردگی دکھانے والے شرکاء میں انعامات تقسیم کیے۔
منتظمین کے مطابق یہ تقریب بلوچستان یوتھ سوشو اکنامک ڈیولپمنٹ پروگرام کے تحت لیڈر شپ ڈیولپمنٹ کے وژن کا حصہ ہے، جس کا مقصد نوجوانوں میں قیادت کی صلاحیتوں کو فروغ دینا اور انہیں بااصول اور درست قیادت کے انتخاب کی پہچان فراہم کرنا ہے۔
کوئٹہ: وزیر اعلیٰ بلوچستان میر سرفراز بگٹی نے کہا ہے کہ قائداعظم محمد علی جناحؒ کے وضع کردہ سنہری اصول، ایمان، اتحاد اور تنظیم—آج بھی پاکستان کے قومی مستقبل کی مضبوط ضمانت ہیں اور ان پر عمل پیرا ہو کر ہی ملک کو درپیش چیلنجز سے نمٹا جا سکتا ہے۔
قائداعظمؒ کی 149ویں یومِ پیدائش کے موقع پر جاری اپنے پیغام میں وزیر اعلیٰ نے کہا کہ بابائے قومؒ نے دیانت، قانون کی بالادستی اور مساوات پر مبنی ایک ایسی ریاست کا تصور دیا تھا جہاں تمام شہریوں کو بلاامتیاز انصاف اور امن میسر ہو۔ ان کے مطابق، اس وژن پر عمل کرنا وقت کی اہم قومی ضرورت ہے۔
میر سرفراز بگٹی کا کہنا تھا کہ قائداعظمؒ کی تعلیمات ہمیں اتحاد و یگانگت کے ساتھ قومی مسائل کا مقابلہ کرنے کا حوصلہ دیتی ہیں۔ انہوں نے اس عزم کا اظہار کیا کہ قائداعظمؒ کے نقشِ قدم پر چلتے ہوئے پاکستان کی عزت، سلامتی اور خوشحالی کے لیے متحد ہو کر محنت کی جائے گی۔
وزیر اعلیٰ بلوچستان نے نئی نسل کی جانب اشارہ کرتے ہوئے کہا کہ نوجوانوں کو قائداعظمؒ کے افکار اور اصولوں سے روشناس کرانا ہم سب کی مشترکہ قومی ذمہ داری ہے تاکہ ایک مضبوط، خودمختار اور خوشحال پاکستان کی تعمیر ممکن بنائی جا سکے۔
ان کا مزید کہنا تھا کہ قائداعظمؒ کا تصورِ پاکستان تمام شہریوں کے لیے امن، برداشت اور انصاف کی علامت ہے اور اسی وژن کے مطابق ملک کی ترقی و استحکام کے لیے حکومت بلوچستان پُرعزم ہے۔
کوئٹہ میں سیکرٹری بلدیات و دیہی ترقی عبدالروف بلوچ کی زیرِ صدارت محکمہ بلدیات و دیہی ترقی حکومتِ بلوچستان اور نادرا بلوچستان کے مابین مشاورتی اجلاس منعقد ہوا۔ اجلاس میں صوبے میں ڈیجیٹل گورننس کے فروغ، عوامی خدمات کو مؤثر بنانے اور لوکل گورنمنٹ دفاتر کے جغرافیائی و انتظامی ڈیٹا کی فراہمی سے متعلق امور پر تبادلہ خیال کیا گیا۔ اجلاس میں نادرا اور محکمہ بلدیات کے اعلیٰ حکام نے شرکت کی۔
کوئٹہ میں کمشنر کوئٹہ ڈویژن شاہزیب خان کاکڑ کی زیرِ صدارت اربن پلاننگ و ڈیزائن کمیٹی کا اجلاس منعقد ہوا جس میں شہر کی اہم شاہراہوں پر نئی تعمیرات پر پابندی عائد کرنے کا فیصلہ کیا گیا۔ اجلاس میں رہائشی علاقوں کو کمرشل ایریاز میں تبدیل کرنے پر پابندی، کمرشل پلازوں میں پارکنگ کی لازمی سہولت اور بلڈنگ کوڈز پر سختی سے عملدرآمد کی ہدایات جاری کی گئیں۔
کوئٹہ: حکومتِ بلوچستان کے تحت شروع کیا گیا بلوچستان اسپیشل ڈویلپمنٹ انیشیٹو (بی ایس ڈی آئی) صوبے کے پسماندہ علاقوں میں بنیادی سہولیات کی فراہمی کے لیے ایک اہم حکومتی پروگرام کے طور پر سامنے آیا ہے۔
سرکاری حکام کے مطابق اس منصوبے کے تحت جنوبی بلوچستان کے پانچ اضلاع کیچ، خاران، واشک، چاغی اور پنجگور میں مجموعی طور پر 137 ترقیاتی اسکیموں کے لیے پانچ ارب روپے مختص کیے گئے ہیں۔ ان منصوبوں کا مقصد دور دراز علاقوں میں صحت، توانائی اور عوامی سہولیات کو بہتر بنانا ہے۔
حکام کا کہنا ہے کہ اب تک 13 منصوبے مکمل کیے جا چکے ہیں۔ ضلع خاران کے علاقوں مسکان، قلات اور کلی مبارک شلتاک میں دو جنازہ گاہیں تعمیر کی گئی ہیں، جبکہ ضلع واشک کے رورل ہیلتھ سینٹر ناگ میں جدید سولر سسٹم نصب کیا گیا ہے۔
اسی ضلع میں 10 رجسٹرڈ مدارس کو بھی سولر توانائی کی سہولت فراہم کی گئی ہے، جس سے مقامی سطح پر توانائی کے مسائل میں کمی آئی ہے۔ اس کے علاوہ واشک میں 40 سولر اسٹریٹ لائٹس نصب کی گئی ہیں، جن کے بارے میں حکام کا کہنا ہے کہ اس اقدام سے عوامی سہولت اور سکیورٹی میں بہتری آئی ہے۔
بلوچستان ترقیاتی پروگرام سے وابستہ حکام کے مطابق بی ایس ڈی آئی کا بنیادی مقصد ایسے علاقوں میں ترقیاتی خلا کو پُر کرنا ہے جہاں ماضی میں بنیادی سہولیات کی کمی رہی ہے۔ ان کا کہنا ہے کہ یہ منصوبہ صوبے میں پائیدار ترقی اور عوامی فلاح کی جانب ایک قدم ہے۔
تاہم بعض ماہرین کا کہنا ہے کہ ان منصوبوں کے طویل المدتی اثرات اور شفافیت کا جائزہ لینا ضروری ہوگا تاکہ یہ دیکھا جا سکے کہ آیا یہ اقدامات واقعی مقامی آبادی کی ضروریات کو پورا کر پا رہے ہیں یا نہیں۔
کوئٹہ : صوبائی سیکرٹری ٹرانسپورٹ بلوچستان محمد حیات کاکڑ اور سیکرٹری پی ٹی اے وحید شریف عمرانی کی ہدایت پر طور ناصر کراس پر مسافر کوچز، ٹرالرز اور دیگر گاڑیوں کی چیکنگ کی گئی۔
کارروائی کے دوران اکثر گاڑیوں کے فٹنس سرٹیفکیٹ جعلی پائے گئے۔ حکام نے مالکان کو وارننگ دی اور ہدایت کی کہ وہ اپنی گاڑیوں کے لیے اصلی فٹنس سرٹیفکیٹ حاصل کریں، ورنہ قانونی کارروائی کی جائے گی۔
اس کے علاوہ حکام نے کہا کہ تمام مسافر گاڑیوں میں دو ڈرائیور رکھنے، سی سی ٹی وی کیمروں کو فعال رکھنے اور تیز رفتاری سے گریز کرنے کی سختی سے پابندی کی جائے تاکہ حادثات سے بچاؤ اور مسافروں کی حفاظت یقینی بنائی جا سکے۔
کیچ، بلوچستان: اینٹی نارکوٹکس فورس (اے این ایف) نے بلوچستان کے ضلع کیچ میں ایک بڑی منشیات کی سمگلنگ ناکام بنا دی ہے۔ ذرائع کے مطابق، اے این ایف نے خفیہ اطلاعات پر ضلع کیچ کے سیٹلائٹ ٹاؤن کے قریب کارروائی کی، جس دوران ایک گاڑی کی تلاشی کے دوران پلاسٹک کے کینز میں چھپائی گئی منشیات کی بڑی مقدار برآمد ہوئی۔
برآمد شدہ منشیات میں 99 کلوگرام آئس، 50 کلوگرام افیون اور 73 کلوگرام چرس شامل ہے، جس کی مجموعی مالیت تقریباً 3 کروڑ 26 لاکھ روپے بتائی گئی ہے۔ کارروائی کے دوران ایک ملزم کو بھی گرفتار کیا گیا ہے، جسے مزید قانونی کارروائی کے لیے پولیس اسٹیشن اے این ایف منتقل کر دیا گیا۔
ذرائع کے مطابق اے این ایف منشیات سمگلنگ کے پورے نیٹ ورک کا سراغ لگانے کے لیے مزید کارروائیاں کر رہی ہے۔ مسلسل نگرانی اور بروقت خفیہ اطلاعات کی بنیاد پر اے این ایف کی کارروائیاں منشیات کی ترسیل کی کوششوں کو ناکام بنانے میں مؤثر ثابت ہو رہی ہیں۔
یہ کامیاب کارروائی اینٹی نارکوٹکس فورس کے منشیات کے خلاف فرنٹ لائن کردار کو ظاہر کرتی ہے۔
کوئٹہ: ڈپٹی کمشنر کوئٹہ مہراللہ بادینی کی زیر صدارت کرسمس کی خوشیوں کے موقع پر مسیحی برادری کو گورنمنٹ فنڈ کی فراہمی سے متعلق ایک اہم اجلاس منعقد ہوا۔
اجلاس میں رکن صوبائی اسمبلی سنجے کمار ، ایڈیشنل ڈپٹی کمشنر جنرل، ایڈیشنل ڈپٹی کمشنر ریونیو، روشن خورشید بروچہ سمیت مسیحی برادری، لاچی برادری، سکھ اور ہندو برادری کے نمائندوں نے شرکت کی۔
اجلاس سے خطاب کرتے ہوئے ڈپٹی کمشنر کوئٹہ مہراللہ بادینی نے کہا کہ کرسمس سے قبل مسیحی برادری کے لیے گورنمنٹ فنڈ کی فراہمی کی منظوری دے دی گئی ہے، جو کرسمس سے پہلے تمام مستحق افراد کو موصول ہو جائے گی۔
انہوں نے کہا کہ اقلیتی برادریوں کی فلاح و بہبود ضلعی انتظامیہ کی اولین ترجیح ہے اور تمام مذاہب کے ماننے والوں کو یکساں سہولیات اور مواقع فراہم کیے جائیں گے۔ ڈپٹی کمشنر نے اس عزم کا اظہار کیا کہ ضلعی انتظامیہ اقلیتوں کے مسائل کے حل اور ان کی خوشیوں میں شراکت کے لیے ہر ممکن اقدامات جاری رکھے گی۔
کوئٹہ : گورنر بلوچستان جعفر خان مندوخیل نے صوبائی وزیر خزانہ میر شعیب نوشیروانی سے ملاقات میں کہا کہ محدود وسائل اور بڑھتے مسائل کے باوجود ترقیاتی منصوبوں کی بروقت تکمیل اولین ترجیح ہے۔
انہوں نے کہا کہ منصوبوں کے ثمرات معاشرے کے غریب اور پسماندہ طبقات تک پہنچنا چاہیے اور تمام اداروں میں شفافیت اور جوابدہی کو یقینی بنایا جائے۔
گورنر نے بنیادی انفراسٹرکچر میں سرمایہ کاری کی اہمیت پر زور دیتے ہوئے کہا کہ سڑکوں، اسکولوں اور صحت کی سہولیات کی بہتری سے اقتصادی پیداوار، معیار زندگی اور سرمایہ کاری کے مواقع بڑھیں گے۔
کوئٹہ: وزیر اعلیٰ بلوچستان میر سرفراز احمد بگٹی نے جمعہ کے روز پولیس ٹریننگ کالج کوئٹہ میں مکمل کیے گئے مختلف ترقیاتی منصوبوں کا باضابطہ افتتاح کیا۔
وزیر اعلیٰ نے پولیس ٹریننگ کالج آمد پر شہدائے پولیس کی یادگار پر حاضری دی، پھولوں کی چادر چڑھائی اور شہداء کے درجات کی بلندی اور ملک و صوبے کے امن و استحکام کے لیے دعا کی۔
تقریب میں وزیر اعلیٰ نے جدید طرز پر تعمیر شدہ فٹ بال گراؤنڈ اور نیو میس کا افتتاح کیا۔ انہوں نے کہا کہ پولیس ٹریننگ کالج میں سہولیات کی بہتری کا مقصد پولیس جوانوں کو بہتر تربیتی ماحول، معیاری رہائش اور صحت مند سرگرمیوں کے مواقع فراہم کرنا ہے تاکہ وہ مستقبل میں اپنے فرائض پیشہ ورانہ انداز میں انجام دے سکیں۔
وزیر اعلیٰ نے مزید کہا کہ بلوچستان پولیس نے مشکل حالات میں ریاستی رِٹ کے قیام، عوام کے جان و مال کے تحفظ اور دہشت گردی کے خلاف جنگ میں لازوال قربانیاں دی ہیں۔ حکومت بلوچستان پولیس کی فلاح و بہبود، تربیت اور استعداد کار میں اضافے کے لیے ترجیحی بنیادوں پر اقدامات کر رہی ہے۔
انہوں نے کہا کہ پولیس ٹریننگ کالج میں مکمل ہونے والے ترقیاتی منصوبے نہ صرف ادارے کے انفراسٹرکچر کو مضبوط کریں گے بلکہ زیر تربیت اور حاضر سروس پولیس اہلکاروں کی جسمانی، ذہنی اور پیشہ ورانہ صلاحیتوں میں بھی بہتری لائیں گے۔
وزیر اعلیٰ بلوچستان نے اس عزم کا اعادہ کیا کہ صوبائی حکومت وسائل کی دستیابی کے مطابق بلوچستان پولیس کو جدید سہولیات فراہم کرتی رہے گی تاکہ پولیس فورس کو ایک مضبوط، باصلاحیت اور مؤثر ادارہ بنایا جا سکے۔
اس موقع پر انسپکٹر جنرل پولیس بلوچستان محمد طاہر خان، کمانڈنٹ پولیس ٹریننگ کالج کوئٹہ شہزاد اکبر اور دیگر اعلیٰ پولیس افسران بھی موجود تھے۔
کوئٹہ میں بلوچستان کی زمینوں کے ریکارڈ کو جدید خطوط پر ڈیجیٹلائز کرنے کے لیے حکومتِ بلوچستان اور لینڈ انفارمیشن مینجمنٹ سسٹم (LIMS) کے درمیان باقاعدہ معاہدہ طے پا گیا ہے۔ اس حوالے سے وزیر اعلیٰ سیکرٹریٹ کوئٹہ میں مفاہمتی یادداشت پر دستخط کی ایک سادہ مگر پروقار تقریب منعقد ہوئی۔
تقریب میں حکومتِ بلوچستان کی جانب سے سینئر ممبر بورڈ آف ریونیو قمبر دشتی اور لینڈ انفارمیشن مینجمنٹ سسٹم کے چیف ایگزیکٹو آفیسر نے معاہدے پر دستخط کیے، جبکہ وزیر اعلیٰ بلوچستان میر سرفراز بگٹی کو منصوبے سے متعلق تفصیلی بریفنگ بھی دی گئی۔
بریفنگ میں بتایا گیا کہ منصوبے کے پہلے مرحلے میں بلوچستان کے 25 اضلاع میں جیوگرافیکل انفارمیشن سسٹم (GIS) کی مدد سے زمینوں کے ریکارڈ کو ڈیجیٹلائز کیا جائے گا۔ اس اقدام کے تحت زمینوں کا ریکارڈ جدید، محفوظ اور شفاف نظام سے منسلک ہوگا، جس سے زمینوں سے متعلق امور میں بہتری اور عوام کو سہولت میسر آئے گی۔
اس موقع پر وزیر اعلیٰ بلوچستان میر سرفراز بگٹی نے کہا کہ زمینوں کے ریکارڈ کی ڈیجیٹلائزیشن صوبے میں شفافیت، بہتر گورننس اور پائیدار ترقی کے لیے ناگزیر ہے۔ ان کا کہنا تھا کہ ڈیجیٹل نظام کے ذریعے بدعنوانی کے امکانات میں کمی آئے گی اور عوام کو زمینوں کے حصول، منتقلی اور تصدیق جیسے معاملات میں نمایاں آسانی فراہم ہوگی۔
وزیر اعلیٰ نے منصوبے پر مقررہ مدت کے اندر اور اعلیٰ معیار کے مطابق عمل درآمد یقینی بنانے کی ہدایت کرتے ہوئے کہا کہ صوبائی حکومت جدید ٹیکنالوجی کے ذریعے عوامی خدمات کے نظام کو بہتر بنانے کے لیے پُرعزم ہے۔
تقریب میں صوبائی وزیر ریونیو میر عاصم کرد گیلو، چیف سیکرٹری بلوچستان شکیل قادر خان، ایڈیشنل چیف سیکرٹری ترقیات زاہد سلیم، پرنسپل سیکرٹری بابر خان، ممبر بورڈ آف ریونیو بشیر احمد بنگلزئی، سیکرٹری خزانہ عمران زرکون سمیت دیگر اعلیٰ حکام نے شرکت کی۔
نادرا اور حکومتِ بلوچستان کے اشتراک سے کوئٹہ میں ڈیجیٹل سول رجسٹریشن مینجمنٹ سسٹم (سی آر ایم ایس) موبائل ایپ کے پائلٹ مرحلے کا باقاعدہ آغاز کر دیا گیا ہے۔
منصوبے کا افتتاح سیکرٹری لوکل گورنمنٹ و رورل ڈویلپمنٹ بلوچستان عبدالرؤف بلوچ نے کیا۔ اس موقع پر ڈائریکٹر نادرا (آر ایچ او کوئٹہ) فیاض الرحمن، ایڈیشنل سیکرٹری لوکل گورنمنٹ ثناء اللہ اور اسسٹنٹ ڈائریکٹر نادرا و انچارج سی آر ایم ایس ضیاء الرحمٰن بھی موجود تھے۔
حکام کے مطابق اس موبائل ایپ کے ذریعے شہری پیدائش، وفات، نکاح اور طلاق کی رجسٹریشن آن لائن کر سکیں گے۔ نادرا سے منسلک ہونے کے باعث نظام کے تحت فارم ب کے اجرا کا عمل بھی خودکار ہو جائے گا۔
حکام کا کہنا ہے کہ اس نظام سے شہریوں کو سہولت، شفافیت اور تیز رفتار خدمات فراہم کی جائیں گی، جبکہ پائلٹ مرحلہ کامیاب ہونے کی صورت میں اسے مرحلہ وار پورے بلوچستان میں نافذ کیا جائے گا۔
چیف سیکرٹری بلوچستان شکیل قادر خان نے پوست کی غیر قانونی کاشت روکنے کے لیے جامع اقدامات پر زور دیا۔ اجلاس میں بتایا گیا کہ صوبائی حکومت نے اب تک 3700 ایکڑ سے زائد رقبے پر پوست کی فصلیں تلف کی ہیں اور بیج کی خرید و فروخت پر پابندی عائد کر دی گئی ہے۔ ضلعی انتظامیہ اور متعلقہ اداروں کو سخت اقدامات اور موثر کوآرڈینیشن کی ہدایات دی گئی ہیں
بلوچستان کے دارالحکومت کوئٹہ میں افغان مہاجرین کی واپسی کے عمل کو مزید تیز کر دیا گیا ہے۔ پولیس اور ضلعی انتظامیہ نے مختلف علاقوں میں سرچ آپریشنز شروع کر دیے ہیں اور متعدد غیر قانونی مقیم افغان شہریوں کو حراست میں لے لیا گیا ہے۔ انتظامیہ کا کہنا ہے کہ ملک بدری کی کارروائیاں قانون کے مطابق تیزی سے جاری رہیں گی۔
نوکنڈی میں عوام کو صاف پانی کی فراہمی کے لیے گھٹ واٹر سپلائی اسکیم کا افتتاح کر دیا گیا ہے۔ اس منصوبے کے تحت شہر کو روزانہ 30 ہزار گیلن پانی فراہم کیا جائے گا، جس سے علاقے میں پانی کی قلت کے مسئلے کے حل کی توقع ہے۔
خضدار پریس کلب کی تعمیر نو، توسیع اور جدید سہولیات کی فراہمی کے لیے ایک کروڑ روپے کے ترقیاتی منصوبے کی منظوری دے دی گئی ہے۔ بی ایس ڈی آئی ٹیم اور محکمہ مواصلات و تعمیرات نے پریس کلب کا تفصیلی دورہ کر کے تجاویز پیش کیں۔ منصوبے سے صحافیوں کو جدید اور بہتر سہولیات دستیاب ہوں۔
